понедельник, 17 августа 2015 г.

"Струба" циклысь



Быд кыв тайӧ книгаас меным.
Быд кыв вотӧс моз босьта.
Чӧсмася-сёя.
Гижӧдсьыс аддза и ачымӧс.
Быттьӧ менам сьӧлӧм струбаысь куртӧма шог.
Казяла и выльсӧ.
Вом дорнам сибӧдча кӧдзыд пу ведра дорышӧ,
юа,
морӧс пань горулӧс мыськовтлас йи ваӧн.
Чужа выльысь.
Кор гижӧдас эм Кыв,
меын -
струбаын ва моз жӧ -
уна пӧв содлӧ олӧмыс.
 




Эня-ая пу


***
Берег дорын
эня-ая пу.
- Тайӧ ми тэкӧд...-
шуи орччалы.
Нинӧм эз вочавидз.
Дерт жӧ...
Ми сыкӧд
абу нэм кежлӧ
сывъясьӧм пуяс.
                                                                                                                                                          Фото - Александр Семенов
                             

понедельник, 3 августа 2015 г.

Корся кывъяс


Корся стӧч да тӧдса кывъяс
Гижны ловтӧ,
Еджыд лэбач...
Инмӧдчыла борд йылӧдзыд,
И ме дорысь лэбан.
Кутшӧм дыр виччыся юӧр...
Воас...
Либӧ некор - оз.
Меным юӧрӧн сэк овлӧ
Туйдор пелысьыслӧн
Гӧрдӧн сотчысь роз...
Либӧ тӧв ныр,
Вына тӧв ныр
Копыртӧдас пуяс...
Либӧ изйӧн
Ыджыд лэбач
Енэжсяньыс
Тювгас
Юас. 


                                                 Фото - Юрий Лисовский

 






четверг, 9 июля 2015 г.

Дзоридзьясӧ бӧрддзисны...



                             Танялы

Дзоридзьясӧ бӧрддзисны...
Синванысӧ кисьтісны
югыд ӧшинь дорам...
Синва войтъяс кабырӧ
чукӧрті да чукӧрті
лӧз-лӧз синва войтъяс...
Косьмис синва визулыс...
дзоридзьясӧ нярмисны...
Кодкӧ выльӧс пыртӧма



                                                                                                                   Фотоыс Евгений Козловлӧн
 

воскресенье, 17 мая 2015 г.

Косьмӧм пу


***
Уна во чӧж
киськала косьмӧм пуӧс.
Но сійӧ оз ловзьы.
А талун,
кыдзи и век,
пыри кухняӧ,
судзӧді джадж вылысь стӧкан,
кисьті сэтчӧ банкаысь шоналыштӧм ва
да кӧтӧді пу гӧгӧр
косьмыштӧм мусӧ.
Куни синмӧс.
И пытшкӧс пемыдас петіс Рильке.
А сы сайын тыдалісны
паськыда шевкнитчӧм чукыля пу вожъяс,
быттьӧ поэтлӧн юрсьыс петісны найӧ.
Вожъяс - кывбуръяс.
Рильке вошис.
А пуыс коли сулавны.
И сійӧ вӧлі Цветаевалӧн
"Кык пу кӧсйӧны ӧта-мӧд дорас..."
кывбурысь.
Сӧмын тай мӧд пуыс эз тыдав,
ӧшиньыс вывті дзоля да, сы ради, гашкӧ.
А сэсся...
тайӧ пуыс лои
менам горт дорысь косьмӧм льӧм пуӧн...

Сійӧс кералісны...
А сійӧ бӧр сувтӧма.

Восьті синмӧс.
Да бара киськалі косьмӧм пуӧс.
Эн юась: мый ради...
Вочакыв оз сюр.
Сійӧ тайӧ му вылас абу.


Фото - Александр Семенов
 

Мыняяс


Берегдор мынясӧ -
кусӧм кодзувъястӧ быттьӧ -
кодкӧ сявкнитӧма эзысь ю пӧлӧн.
Мӧвпнам тшӧкыда волывла татчӧ -
Путшкум берегӧ,
кӧні колины медбур гожся лунъясӧ челядьдырйи.
Тані то сулаліс Ванялӧн пыжыс.
Тані - Сашкӧлӧн.
А тані ми Оля чойкӧд пожъясьлім
да чукӧртлім мыняяс.
И век корсим медся-медсясӧ.

Гашкӧ, тайӧ изторъясыс бӧрыннас и лоины
менам мӧвпъясӧн.
Кадысь-кадӧ
юрвежысь выльысь и выльысь корсяла найӧс
да век кӧсъя аддзыны
медся-медсясӧ.

Олялы сэки мойвиліс.
Сылӧн киыс ачыс аддзаліс медбурсӧ.
Чой важӧн нин абу.
А ме век на корся видзӧдласнам сійӧс...
Мед петкӧдлыны миян сыкӧд берегысь 
выльӧн на аддзӧм
мыйӧнкӧ менӧ чуймӧдысь изтор. 

 Фото - Ирина Калинина
 

воскресенье, 10 мая 2015 г.

Пӧкрӧв лунӧ


Пӧкрӧв лунӧ
Медводдза лым уси.
Важгорт сиктӧй
Кывтӧ еджыд юсьӧн.

Кокни бордъя
Югыд лов моз лэбӧ.
Татшӧм кадӧ
Кык пӧв содлӧ эбӧс.

Сьолӧмшӧрӧн
Ыдждӧдла ме тэнӧ,
Чужанінӧй,
Вежа ваа енмӧй.

Эзысь юсьӧн
Вӧтам бара волан.
Важгорт сиктӧй,
Кыдз нӧ метӧг олан?

Фото - Ирина Калинина